Markabka dagaal oo ka tirsan Ciidanka Badda Turkiga ayaa soo gaaray Dekedda Muqdisho ka dib saxiixa heshiis difaaca iyo dhaqaalaha ee u dhexeeya Soomaaliya iyo Turkiga bishii Febraayo ee sannadkan.

Markabkan Kinaliada F514 ayaa ku xirtay  dekedda Talaadadii, laba bilood ka dib markii la saxiixay heshiiska taariikhiga ah ee labada dal, kaasoo Turkiga uu ku oggolaaday inuu bixiyo taageero amni oo badda Soomaaliya ah.

Madaxweynaha Soomaaliya Xasan Sheekh Maxamuud, dhowr wasiir, iyo safiirka Turkiga u fadhiya Soomaaliya, Alper Aktas, ayaa ka qayb galay xafladda soo dhoweynta.

Madaxweyne Maxamuud ayaa ka hadlay xafladda, isagoo mahadcelin u diray Turkiga oo marar badan caawiyay Soomaaliya, isagoo ku tilmaamay "dal saaxiib  iyo walaal ah," wuxuuna uga mahadceliyay Ankara heshiiska ilaalinta Soomaaliya.

Madaxweynaha ayaa sidoo kale u mahad celiyay dowladda Ankara heshiiska difaaca, isagoo sheegay in hadda amniga  badda Soomaaliya uu noqon doono mid xooggan.

Wasiirka Difaaca Soomaaliya, Cabdulkadir Maxamed Nuur, ayaa u sheegay wakaaladda wararka ee Anadolu in heshiisku uu muujinayo xiriirka adag ee labada dal.

Heshiis “Taariikhi” ah

Wasiirrada difaaca ee Soomaaliya iyo Turkiga ayaa heshiiska iskaashi saxiixay bishii Febraayo si loo xoojiyo xiriirka labada dal iyo xasilloonida gobolka.

Heshiiska, oo ah mid 10 sano ah, ayaa si weyn u xoojin doona dadaallada dowladda Soomaaliya ee ilaalinta madaxbannaanideeda, sida uu sheegay Wasiirka Warfaafinta, Daud Aweis, ka dib markii heshiisku ogolaansho ka helay baarlamaanka Soomaaliya.

Ra'iisul Wasaare Xamza Cabdi Barre ayaa sidoo kale ku tilmaamay heshiiskan mid "taariikhi ah," isagoo u mahadceliyay dowladda Turkiga iyo dadkeeda taageerada joogtada ah ee ay siiyaan dowladda iyo dadka Soomaaliya.

Ankara ayaa leh safaaradda ugu weyn ee Afrika oo ku taalla Muqdisho, waxaana ay sidoo kale dhistay xarunta militari ee ugu weyn ee dalka dibaddiisa ah, taas oo loogu talagalay tababarka ciidanka qaranka Soomaaliya.