Mareykanka ayaa si rasmi ah u soo saaray xeer si wax ku ool ah uga horjoogsanaya tiknoolajiyada Shiinaha iyo Ruushka in lagu isticmaalo gawaarida laga iibiyo suuqyada Mareykanka, isagoo bartilmaameedsanaya qalabka software iyo hardware-ka ee kasoo jeeda dhaqaalaha labaad ee ugu weyn adduunka sababo la xiriira khataraha amniga qaranka.
Ku dhawaaqistan oo Talaadadii la sameeyey, taasoo sidoo kale khusaysa tiknoolajiyada Ruushka, waxay timid iyadoo Madaxweynaha xilka kasii degaya Joe Biden uu soo gabagabeynayo dadaallada lagu kordhinayo xakameynta Shiinaha, kaddib muddo dheer oo la waday nidaam sharci dejin ah.
“Gawaarida maanta maaha oo kaliya biraha ku dul socda taayirada, balse waa kumbiyuutarro,” ayay tiri Xoghayaha Ganacsiga ee Mareykanka Gina Raimondo.
Waxay xustay in gawaarida casriga ah ay ka kooban yihiin kamarado, mikarofano, GPS, iyo tiknoolajiyado kale oo internet-ka ku xiran.
"Tani waa hab qorsheysan oo lagu hubinayo inaan ka fogeyno tiknoolajiyada uu sameeyo Jamhuuriyadda Dadka ee Shiinaha iyo Ruushka waddooyinka Mareykanka," ayay ku dartay.
Xeerkan ugu dambeeya wuxuu hadda khuseeyaa kaliya gawaarida rakaabka oo miisaankoodu ka yar yahay 10,001 rodol, sida uu sheegay Waaxda Ganacsiga Mareykanka.
Si kastaba ha ahaatee, waaxdu waxay qorsheyneysaa inay soo saarto xeerar gaar ah oo ku saabsan tiknoolajiyada gawaarida ganacsiga sida baabuurta xamuulka iyo basaska "mustaqbalka dhow."
Xiriir Ku Filan
Sida ku cad xeerkan cusub, xitaa haddii baabuur rakaab ah lagu sameeyey gudaha Mareykanka, soo-saareyaasha leh "xiriir ku filan" oo la leh Shiinaha ama Ruushka looma oggolaan doono inay iibiyaan baabuur cusub oo leh qalab iyo software ku saabsan isku xirka dibadda iyo wadista iskeed u shaqeyneysa.
Xayiraadda iibinta waxay dhaqan galaysaa sanadka moodelka 2027.
Xayiraaddan sidoo kale waxay mamnuuceysaa soo dejinta qalabka iyo software-ka haddii ay xiriir la leeyihiin Beijing ama Moscow.
Xeerarka lagu xaddidayo software-ka waxay dhaqan galayaan sanadka moodelka 2027, halka xakameynta qalabka ay dhaqan galeyso sanadka moodelka 2030.
Talaadadii, Madaxweyne Biden wuxuu soo saaray amar fulineed oo lagu dedejinayo dhismaha kaabayaasha lagu horumarinayo sirdoonka macmalka ah (AI) gudaha dalka.
Si kastaba ha ahaatee, tallaabooyinka Mareykanka ayaa laga yaabaa inay soo jiitaan jawaab-celin ka timaadda Beijing, iyadoo Wasaaradda Ganacsiga ee Shiinaha ay horey u sheegtay in xaddidaadaha dhoofinta ee la xiriira AI ee Isniintii lagu dhawaaqay ay yihiin "ku tumasho cad" oo lagu sameeyey xeerarka ganacsiga caalamiga ah.
"Shiinuhu wuxuu qaadi doonaa tallaabooyin lagama maarmaan ah si uu si adag u ilaaliyo xuquuqdiisa iyo danihiisa sharci ee saxda ah," ayay wasaaraddu tiri.
XIGASHO: TRT WORLD IYO WAKAALADAHA
