Ugu yaraan 25 macdan-qode ayaa la dilay, halka 13 kalena ay ku dhaawacmeen, kadib markii ay koox argagixiso ah jidgooyo u dhigeen kolonyo gaadiid ah oo marayay waqooyiga bari ee Mali, gaar ahaan meel u dhow magaalada Gao, sida ay shaaciyeen ciidamada dowladda.
Ciidamada qalabka sida ee Mali (FAMa) waxay sheegeen in 19 argagixiso la dilay markii ay qaadeen weeraro aargoosi ah oo ay kaga jawaabayeen weerarkaasi argagixiso, sida lagu sheegay warbixin lasoo saaray fiidnimadii Sabtidii.
Falkaan arxan darrada ah wuxuu dhacay galabtii Jimcaha, markii kolonyo gaadiid ah oo siday shaqaalaha shirkad shisheeye oo ka shaqeysa macdanta, laguna ilaalinayay ciidamo milateri, ay la kulmeen weerar jidgooyo ah oo lagu qaaday inta u dhaxaysa Gao iyo Ansongo, meel ku dhow Kobe, qiyaastii 30km (19 mayl) u jirta Gao.
"Argagixisadu waxay si kas ah u beegsadeen rakaab shacab ah oo cabsiday, iyagoo weeraray gaadiidkii ay saarnaayeen," ayaa lagu yiri bayaanka militariga.
"Inkasta oo ay ciidamada FAMa si degdeg ah uga jawaabeen weerarka, haddana saddex gaari oo shacab ah ayaa la weeraray, waxaana la dilay 25 qof, halka 13 kalena la dhaawacay. Intooda badan dadka dhintay waxay ahaayeen dhallinyaro macdan-qodeyaal ah oo ka shaqeynayay shirkad shisheeye oo u socotay goobta macdanta dahabka ee N'Tahaka, gobolka Gao."
Bayaanka milateriga ma sheegin magaca kooxda weerarka geysatay, laakiin Daacish iyo Al Qaacida la xiriira kooxo mintidiin ah ayaa horey uga fuliyay weerarro gobolkaas ka dhacay.
Malaayiin Dad Ah Oo Saameyn Ku Yeelatay Xaaladda Gobolka
Sanadihii la soo dhaafay, magaalada Gao waxay la kulantay weerarro dilaa ah, taasoo keentay in ciidamada Mali ay sameeyaan ilaalo maalinle ah si ay dadka shacabka ah u difaacaan.
Sanadihii u dambeeyay, rabshadaha ka jira gobolka ayaa sababay dhimashada kumannaan qof iyo barakaca malaayiin qof oo ku nool Mali, Burkina Faso, iyo Niger.
Dhanka kale, militariga ayaa ku wargeliyay shacabka in hawlgallada amniga, gaar ahaan kuwa laga fulinayo wadada RN-17 oo shacabku isticmaalaan, ay sii socon doonaan.
"Ujeeddada howlgaladan waa in la burburiyo shabakadaha argagixisada ee carqaladeynaya dhaq-dhaqaaqa xorta ah ee shacabka, isla markaana maalgelinaya argagixisada iyagoo helaya madax-furasho," ayaa lagu yiri warbixinta militariga Mali.
XIGASHO: AA
