Aasaasaha ByteDance, Zhang Yiming, ayaa ah qofka ugu taajirsan Shiinaha, isagoo leh hanti gaaraysa $49.3 bilyan, sida uu muujiyey liiskii sannadlaha ahaa ee taajiriinta, inkastoo dadka ku jira ganacsiyada dhulka iyo tamarta dib loo cusboonaysiin karo aysan horukac fiican sameyn sanadkan.
Zhang, oo 41 jir ah, ayaa 2021-dii iska casilay xilka madaxa fulinta ee shirkadda ByteDance, oo caalamka looga yaqaan madasha madadaalada ee TikTok, wuxuuna noqday qofka 18-aad ee ugu taajirsan Shiinaha ka dib markii 26 sano ka dib la daabacay Liiska Taajiriinta Shiinaha ee Hurun.
Wuxuu booska ka qaaday mudane Zhong Shanshan, kaas oo galay kaalinta labaad ka dib markii hantidiisa ku timid hoos u dhac gaaraya 24%, taas oo noqotay $47.9 bilyan.
Iyadoo ay socoto dood sharciyeed ku saabsan hantida shirkadda ee Mareykanka, dakhliga shirkadaa ByteDance ayaa kor u kacay 30% sanadkii hore, gaadhayna $110 bilyan, sida uu sheegay Hurun, taas oo keentay inay kobocdo hantida shakhsiyeed ee Zhang.
Qofka saddexaad ee liiska waa aasaasaha Tencent mudane Pony Ma, halka Colin Huang, oo ah aasaasaha PDD Holdings, uu u dhacay kaalinta afraad isagoo sanadkii hore ku jiray kaalinta saddexaad, inkastoo shirkaddihiisa ku fooggan suuqyada ganacsiga internetka, Pinduoduo iyo Temu, ay wali muujinayaan koboc dakhli oo wanaagsan.
Tirada bilyaneerada ku jira liiska ayaa waxaa ku yimid hoos u dhac gaaraya 142, iyagoo ka soo degay 753, taasoo ka dhigan hoos u dhac ka badan saddex meelood meel marka loo barbardhigo tiradii ugu sarreysay ee 2021.
"Sanad adag ayaa soo maray dhaqaalaha iyo suuqyada saamiyada ee Shiinaha," ayuu yiri Guddoomiyaha Warbixinta Hurun, Rupert Hoogewerf.
Suuqa hantida guryaha oo hoos u dhacaya
Khasaaraha ugu weyn ee hantida ayaa ka yimid qaybta hantida ma-guurtada ah ee Shiinaha, ayuu yiri, halka qalabka elektaroonigga ah ee macaamiisha uu si muuqata u sii kordhayo, iyadoo aasaasaha Xiaomi, Lei Jun, uu $5 bilyan ku kordhiyey hantidiisa sanadkan.
"Shirkadaha soo saara qalabka soollarka, baytariyada lithium-ka iyo gawaarida korontada ayaa wajahay sanad adag, maadaama tartanku sii xoogaystay, taasoo keentay in alaabo badani ku yaraato suuqa, iyo khatarta cashuuraha oo sii kordhisay hubanti la'aanta," ayuu yiri Hoogewerf, oo ah cilmi-baare sare ka ah soo saarayaasha liiska Hurun.
"Shirkadaha soo saara qalabka soollarka ayaa hantidooda hoos uga dhacday illaa 80% marka loo barbardhigo heerkii ugu sarreeyey oo ay gaareen 2021-dii, halka kuwa baytariyada iyo gawaarida korontada soo saara ay hantidooda hoos uga dhacday kala bar iyo rubuc siday u kala horreeyaan."
XIGASHO: REUTERS
