Madaxweynaha Rwanda, Paul Kagame, iyo dhiggiisa Kongo, Felix Tshisekedi, ayaa ka qaybgalay shir ka dhacay Tanzania Sabtidii, halkaas oo madaxda gobollada ay ugu baaqeen xabbad-joojin degdeg ah oo laga hirgeliyo Jamhuuriyadda Dimuqraadiga ee Kongo (DRC).
Kooxda hubeysan ee M23 ayaa si xawli ah ula wareegtay dhul ballaaran oo ka tirsan bariga DRC, oo hodan ku ah macdanta, taasoo dhalisay kumanaan dhimasho ah iyo barakicinta dad aad u badan.
Jabhaddu waxay toddobaadkii hore qabsatay magaalada istiraatiijiga ah ee Goma, oo ah caasimadda gobolka Waqooyiga Kivu, waxayna hadda u sii gudbeysaa gobolka Koonfurta Kivu, taasoo qeyb ka ah colaadaha tobanaan sano ka jiray gobolkaas.
Madaxweyne Kagame ayaa si shaqsi ah uga qaybgalay shirka ka dhacay magaalada Dar es Salaam ee dalka Tanzania, kaasoo ay isugu yimaadeen siddeedda waddan ee Urur Goboleedka Bariga Afrika (EAC) iyo 16-ka dal ee ku bahoobay Bulshada Horumarka Koonfur Afrika (SADC).
Madaxweyne Tshisekedi wuxuu kaga qeybgalay shirkan aaladda muuqaalka.
"M23 ha joojiso horusocodka"
"Waxaan ugu baaqaynaa dhammaan dhinacyada inay hirgeliyaan xabbad-joojin dhab ah, gaar ahaan M23 inay joojiso horumarka ay samaynayso iyo ciidamada DRC inay joojiyaan tallaabooyinka aargoosiga ah," ayuu yiri Madaxweynaha Kenya, William Ruto, oo ah guddoomiyaha haatan ee EAC.
Madaxweynayaasha Kenya, Soomaaliya, Uganda, Zambia, iyo Zimbabwe ayaa ka mid ahaa madaxda ka qeybgalay shirka markii uu furmay.
Tan iyo markii M23 dib usoo laabatay sanadkii 2021, wada-hadalladii nabadda ee lagu qabtay Angola ama Kenya ma aysan miro dhalin, waxaana burburay xabbad-joojin dhowr jeer la isku dayay.
Dowladda Rwanda waxay beenisay inay taageero militari siiso M23.
Ka Ganacsiga Macdanta
Warbixin ay Qaramada Midoobay soo saartay sanadkii hore ayaa sheegtay in Rwanda ay haysato ilaa 4,000 oo askari oo ku sugan gudaha DRC, isla markaana ay macaash ka sameysatay tahriibinta dahabka iyo macdanta coltan oo lagama maarmaan u ah soo saarista taleefoonada casriga ah iyo kombuyuutarrada laptop-ka.
Dowladda Rwanda waxay ku eedaysay DRC inay hoy siisay kooxda hubeysan ee FDLR, oo ah koox ay aasaaseen qowmiyadda Hutu-ga ee ka qeyb qaatay xasuuqii Tutsiga sanadkii 1994.
Shirkan ayaa yimid xilli M23 ay ku sii siqeyso magaalada Kavumu, oo ah goob istiraatiiji ah oo ay ku taallo garoon diyaaradeed muhiim u ah sahayda ciidamada Kongo.
Kavumu waxay tahay caqabadihii ugu dambeeyay kahor inta aysan jabhaddu gaarin caasimadda gobolka Koonfurta Kivu, Bukavu, oo xadka Rwanda ku taal, halkaasoo dadweynuhu cabsi xoogan ka muujiyeen.
Madaxa Xuquuqda Aadanaha ee Qaramada Midoobay, Volker Turk, ayaa ka digay "Haddii aan waxba la qaban, waxa ugu xun ayaa laga yaabaa inuu ku dhaco shacabka bariga DRC iyo xitaa dalalka deriska ah."
Turk wuxuu sheegay in laga soo bilaabo 26-kii Janaayo, markaasoo M23 ay qabsatay Goma, la xaqiijiyay in la dilay ku dhawaad 3,000 oo qof, halka 2,880 kalena ay ku dhaawacmeen, iyadoo tirada dhabta ah laga yaabo inay intaas ka badato.
Jabhaddu waxay sameysatay maamulka cusub
M23 waxay horey uga dhistay magaalada Goma maamulka u gaarka ah, iyadoo magacaawday duq magaalo iyo mas’uuliyiin kale oo maamulaya magaalada.
Jabhaddu waxay sheegtay inay u sii gudbeyso caasimadda dalka ee Kinshasa, inkastoo ay u jirto qiyaastii 1,600km.
Ciidamada dowladda DRC, oo caan ku ah tababar la’aan iyo musuqmaasuq, ayaa marar badan laga saaray jiidaha dagaalka.
Weerarka M23 wuxuu sare u qaaday cabsida laga qabo dagaal ballaaran oo gobolku galay, maadaama dalal badan oo ay ka mid yihiin Koonfur Afrika, Burundi, iyo Malawi ay taageero ciidan siiyaan DRC.
XIGASHO: AFP
