Hoggaamiyaha ugu weyn mucaaradka Ivory Coast, Tidjane Thiam, ayaa Jimcihii ku dhawaaqay inuu ka tanaasulay dhalashada Faransiiska si uu ugu tartamo doorashada madaxtinimada ee dhici doonta dabayaaqada sanadkan.
Thiam, oo ah hoggaamiyaha Xisbiga Dimuqraadiga ee Ivory Coast (PDCI), wuxuu ku tilmaamay tallaabadan "tallaabo muhiim ah" oo si horey loo qorsheeyay, wuxuuna sheegay inuu gudbiyay codsigiisa ka bixitaanka dhalashada Faransiiska.
"Tani waxay ii ogolaaneysaa inaan noqdo muwaadin keliya oo Ivorian ah xilliga doorashada," ayuu yiri, isagoo xusay in tallaabadan ay tahay "arrin rasmi ah oo xafiiseed".
Dastuurka Ivory Coast, qodobkiisa 55-aad, wuxuu dhigaya in musharraxa madaxweynenimada uu noqon karo "muwaadin Ivorian ah oo keliya, kuna dhashay aabbe ama hooyo Ivorian ah".
Thiam, oo 62 jir ah, horeyna usoo noqday injineer, wasiir iyo maareeye bangi, wuxuu dalka dib ugu soo laabtay sanadkii 2022, isagoo muddo 20 sano ah ka maqnaa Ivory Coast.
Bishii Diseembar 2023, wuxuu noqday hoggaamiyaha xisbiga PDCI, balse wali si rasmi ah looguma magacaabin musharraxa rasmiga ah ee xisbiga. Wasiirkii hore ee ganacsiga, Jean-Louis Billon, ayaa sidoo kale shaaciyay inuu u sharaxan yahay magacaabista xisbiga PDCI.
Waxaa jira musharraxiin kale oo u tartamaya doorashada madaxtinimada ee dhici doonta 25-ka Oktoobar.
Madaxweynihii hore ee dalka, Laurent Gbagbo (2000-2011), ayaa loo magacaabay inuu u tartamo xisbiga PPA-CI, balse looma ogola inuu u ordo sababo la xiriira xukun dambiyo ciqaabeed ah oo lagu helay.
Xaaskiisii hore, Simone Ehivet Gbagbo, ayaa iyaduna ku dhawaaqday musharaxnimadeeda.
Ra’iisul wasaarihii hore ee dalka (2000-2003), Pascal Affi N'Guessan, wuxuu u taagan yahay xisbiga Ivorian Popular Front (FPI).
Madaxweynaha talada haya, Alassane Ouattara, oo xilka hayay tan iyo 2011, wali ma shaacin inuu u tartami doono muddadii afaraad. Bishii hore, wuxuu sheegay inuu "jeclaan lahaa inuu sii wado u adeegidda dalkiisa", taasoo muujinaysa inuu wali xisaabtan ku jiro.
XIGASHO: AFP
