Eedeeynta Madaxweynaha Soomaaliya ayaa timid xilli uu jiro khilaaf u dhaxeeya Addis Ababa iyo Muqdisho oo ku saabsan heshiis dhexmaray Itoobiya iyo gobolka gooni isku taagga ah ee Somaliland, kaasoo u oggolaanaya Itoobiya inay hesho marin badda oo ay muddo dheer raadineysay.
"Subaxnimadii maanta markii aan isku diyaarinayay inaan ka soo qayb galo fadhiga xiran ee shirka, ciidamada amaanka ee Itoobiya ayaa xannibay waddada aan mari lahaa," ayuu yiri Madaxweyne Xasan Sheekh Maxamuud oo saxaafadda la hadlay, ka dib markii uu ugu dambeyntii galay goobta shirka.
Madaxweynaha ayaa sheegay inuu mar kale isku dayay inuu galo goobta shirka isagoo la socday madaxweynaha Jabuuti, Ismaaciil Cumar Geelle, laakiin waxaa laga hor istaagay gelitaanka xarunta Midowga Afrika.
"Askar hubeysan ayaa istaagtay hortayada oo diiday inay na siiyaan ogolaansho gelitaanka xaruntan," ayuu intaas ku daray.
Si kastaba, Itoobiya ayaa si degdeg ah uga jawaabtay eedeynta, iyadoo sheegtay in si "diiran" loo soo dhoweeyay Madaxweyne Xasan Sheekh Maxamuud, isla markaana loo fidiyay sharafkii caadiga ahaa ee loogu talagalay madaxda dalalka iyo dowladaha ee ka soo qayb galay shirka.
Afhayeenka Ra’iisul Wasaaraha Itoobiya, Billene Seyoum, ayaa u sheegtay AFP in xannibaadda lagu sameeyay wafdiga Soomaaliya kadib markii ay isku dayeen inay gudaha u galaan xarunta AUC iyagoo wata hub.
"Amniga wafdiga Soomaaliya ayaa isku dayay inay la galaan xarunta AUC hub, waxaana arrintaas xannibay amniga AUC," ayey tiri Billene Seyoum.
Wasaaradda arrimaha dibadda ee Soomaaliya ayaa soo saartay war-saxaafadeed ay ku sheegeyso inay "si adag" u cambaareyneyso isku dayga dowladda Itoobiya ee ah in la xannibo wafdiga Soomaaliya.
Waxay sidoo kale ka codsatay Midowga Afrika inuu sameeyo "baadhitaan madax-bannaan oo lagu kalsoonaan karo" si looga jawaabo falkaas ceebta ah.
