Nepalın Gundu kəndindəki çiçək tarlaları, çiçək mövsümündə sarı, narıncı və bənövşəyi rənglərlə bəzənir. Çiçək yığan qadınlar, hindu festivallarında istifadə olunan çələngləri sataraq gəlir əldə edirlər. Katmandu vadisinin kənarında yerləşən Gundu kәndi parlaq rəngli başçıqlı qomfrena və mәxmәr gülü ilə məşhurdur. Hinduların "Tihar" işıqlar festivalı zamanı bu çiçəklərə olan tələbat xüsusilə artır.

Kəndli qadınlar  evləri və məbədləri bəzəmək, eləcə də çələnglər hazırlamaq üçün tarlalara çiçək toplamağa gedirlər. Bu mövsümi çiçəkləri toplayıb çələnglərə çevirmək zəhmət tələb etsə də, Gundu kəndindəki qadınlar bunu gəlirli bir sənayeyə çevirə biliblər.

56 yaşlı Sarasvoti Bista, çiçək tarlası sahibi olaraq bildirib: "Bu sənaye kəndimizdəki qadınlar üçün daha çox iş imkanı yaratdı. Evdən çıxmağa ehtiyac yoxdur, çələng hazırlayaraq yaxşı gəlir əldə edirik."

Bu sәnaye çiçəklənir

Dünya Bankının məlumatına görə, əhalisinin əksəriyyəti hindulardan ibarət olan Himalay ölkəsi Nepalda adambaşına düşən ümumi daxili məhsul 1324 dollardır.

Kənddəki bir səlahiyyətlinin verdiyi məlumata görə, çiçəklənən çiçək ticarəti ilə təxminən 500 ailə hər il bir milyondan çox çələng istehsal edir və 133.000 dollardan çox gəlir əldə edir. Festival dövründə damlardan və verandalardan asılan çələnglər, Nepalın çiçək mərkəzi olan kəndini bəzəyir. Kənd, parlaq bənövşəyi, qırmızı və narıncı rənglərlə boyanır.

"Tihar" festivalı zamanı tünd bənövşəyi başçıqlı qomfrena çiçəyinə olan tələbat artır. Qurudulmuş çiçəklər isə lazım olan qayğı ilə aylar, hətta illərlə öz gözəlliyini qoruyub saxlaya bilir. Tihar ayının beşinci günü isə bacılar, qardaşlarına uzun ömür arzulamaq məqsədilə simvolik hədiyyə olaraq çələnglər verirlər.

Nepal Çiçəkçilik Assosiasiyasının məlumatına görə, 2024-cü ildə Nepalda təxminən 2,5 milyon başçıqlı qomfrena çiçəyi istehsal edilib ki, bu da keçən illə müqayisədə 10 faiz artım deməkdir.

Çiçək Dərnəyinin nümayəndəsi Dilip Bade bildirib: “Biz müxtəlif ölkələrə də gül göndəririk.” Dərnəyin yaydığı məlumata görə, ABŞ, Avstraliya, Cənubi Koreya, Yaponiya və Avropaya 1,4 milyon dollar dəyərində 200 min çələng ixrac ediləcək.

Lakin sürətlə inkişaf edən çiçəkçilik sənayesi, getdikcə şiddətlənən daşqınlardan mənfi təsirləndi və təxminən 1,1 milyon dollar zərər gördü.