Sudan hakimiyyəti avqustun әvvәlindә vəba xəstəliyini epidemiya elan edib. Sudan Səhiyyə Nazirliyinin məlumatına görə, ölkədə avqust ayından etibarən vəba epidemiyası nəticəsində 1205 nəfər ölüb, 44,729 yoluxma faktı qeydə alınıb. Nazirlik çərşənbə axşamı yaydığı bəyanatda müxtəlif ştatlarda vəbaya 43 yoluxma faktının qeydə alındığını açıqlayıb.

Xəstəlik Sudanın 18 əyalətindən 11-də, o cümlədən Xartum, Əl-Cəzirə, Əl-Qədərif, Kassala, Nil çayı, Şimali Ştat, Ağ Nil və Sennar ştatlarında qeydə alınıb.

Sudan avqustun əvvəlində vəba xəstəliyini rəsmən epidemiya elan edib. Çirklənmiş su vasitəsilə yayılan bakteriyaların yaratdığı xəstəlik, şiddətli ishal və susuzluğa səbəb olur. Müalicə olunmazsa, bir neçə saat ərzində ölümcül ola bilər.

Vəba epidemiyası Sudan ordusu ilə Çevik Dəstək Qüvvələri (RSF) arasında davam edən toqquşmalar səbəbindən yaranan humanitar böhran fonunda yayılıb.

Birləşmiş Millətlər Təşkilatı və yerli mənbələrin məlumatına görə, 2023-cü ilin aprelində başlayan qarşıdurmalar nəticəsində 20 mindən çox insan ölüb, 14 milyondan çox insan isə yurd-yuvalarından didərgin düşüb.