Президент және Әділет және даму партиясының төрағасы Ердоған партиясының Түркия Ұлы Ұлттық Мәжілісіндегі топ жиналысында былай деді:

“Сіздер де байқап отырғандай, әлем жаңа және түбегейлі өзгерістердің алдында тұр. Сол сияқты біздің аймақ та солтүстігімен, оңтүстігімен соғыстардың, қақтығыстардың, қырғындардың, зұлымдықтардың ортасында тұр. Осындай жағдайда Республикалық одақ ретінде біз тарихи жауапкершілікпен бетпе-бетпіз. Түркияның саяси және экономикалық тұрақтылығын сақтау, әлеуметтік бейбітшілікті нығайту және мақсаттарымызға қарай алға жылжу үшін күресудеміз”

“Қоғамды біріктіретін саясатпен қызмет етудеміз”

Шын мәнінде, бұл көрініс тек Әділет және даму партиясымен немесе Республикалық одақпен шектелмейді. Саяси спектрдің қай жерінде болмасын, өз еліне, өз халқына жауапкершілік сезінетін әрбір адам осы күреске қолдау көрсетуі, үлес қосуы, ең болмағанда, бұзушы ұстанымнан аулақ болуы керек. Егер сөз отан, халық және мемлекет туралы болса, қалғаны тек ұсақ-түйек мәселелер. Әлемнің көптеген жерінде ұлттық мәселелерде билік пен оппозиция деп бөлі жармай, ортақ ұстаным көрсетілетіні бәрімізге белгілі. Жеке өз басымыздан алғанда, біз де жарты ғасырға жуық саяси өмірімізде осыны жақтадық. Бөлуші емес, біріктіруші, қарама-қайшылық тудырмайтын, ортақ құндылықтар айналасында қоғамның барлық топтарын біріктіруге тырысатын саясатпен елімізге қызмет етуге тырыстық.

Біз көп жағдайда біз қалаған көзқарасты көрмесек те, бауырластық саясатымыздан, еңбек және қызмет саясатымыздан бас тартпадық. 2001 жылдың 14 тамызынан бастап Юнус Эмре секілді “Мен дау үшін келмедім, менің ісім – махаббат үшін. Достың үйі – жүректер. Жүректерді татуластыруға келдім” деп айтамыз. Тек отан жерінде ғана емес, аймағымыздан бастап бүкіл әлемде бейбітшілік, тыныштық, әділет және ынтымақтастық рухының үстемдік етуі үшін күндіз-түні жұмыс істеп жатырмыз. Түркия жаһандық саясаттың негізгі орталықтарының бірі болу рөлін күннен-күнге күшейтуде. Мың күннен асқан Ресей-Украина соғысы және 14 айға созылған Газа геноциді сияқты аймағымыздағы барлық дағдарыстарды шешу үшін тынымсыз күш салудамыз. Израиль мен Ливан арасындағы бүгін таңертең күшіне енген бітімгершілік келісіміне қанағаттанамыз. Аумақта тыныштықты сақтау тұрғысынан барлық тараптардың, әсіресе Израильдің өз міндеттерін толық орындауын күтеміз. Газадағы қырғынның тоқтауы және тұрақты бітімгершіліктің орнауы үшін Түркия ретінде кез келген үлес қосуға дайын екенімізді білдіремін.

“Мақсатымыз – халық, межеміз – ұлы Түркия”

Біз осы дипломатиялық қадамдарды саяси тұлғамызбен емес, ең алдымен осы елдің және халықтың бір мүшесі ретінде жүзеге асырамыз. Мүшесі болғанымызға әрдайым қуанатын қасиетті халқымызға ең жақсы түрде қызмет етуді мақсат етеміз. Жәбірленушілер мен жапа шеккендердің үміті болған Түркия Республикасын барлық салада гүлдендіру, қуатты, өркендеген, беделді, табысты елге айналдыру жолындамыз. Біздің мақсатымыз – халық, межеміз – ұлы Түркия. Түркия ғасырын құрудың әділ мақтанышы мен толқынысын сезінеміз. Уәде бердік, ант еттік. Мызғымас сеніммен мақсатымызға бағыт алдық. Алланың қолдауымен, халқымыздың қолдауымен Түркия ғасырына міндетті түрде жетеміз.