Претседателот на Одборот на Стопанската комора на Анкара (АТО), Ѓурсел Баран, изјави дека ажурирањето на договорот за слободна трговија меѓу Туркије и Северна Македонија е на дневен ред и додаде: „Веруваме дека трговијата меѓу нашите земји уште повеќе ќе се зголеми со проширувањето на договорот на нови области“, известува Анадолу.

Според соопштението на Комората, во АТО се одржа Редовниот состанок на Собранието на 29-тиот периодичен состав, одржан со заедничко учество на Комитетот на АТО и членовите на Собранието, под претседателство на претседателот на Собранието на АТО, Мустафа Деријал, и со учество на поранешниот претседател на Северна Македонија, проф. д-р Ѓорге Иванов.

Баран на средбата изјави дека ја гледа Северна Македонија како клуч за мирот на Балканот и дека инвестициите и трговските односи меѓу двете земји се развиваат од година во година.

Посочувајќи дека Северна Македонија има позиција на вистинска база од аспект на надворешната трговија и инвестициите, Баран го истакна следново:

„Пред 10 години нашата надворешна трговија беше околу 400 милиони долари, но денес надмина 900 милиони долари. Нашите турски компании имаат инвестиции во Северна Македонија кои се приближуваат кон 2 милијарди долари, од банкарство до градежништво, од управување со аеродроми до образование, од текстил и готова облека до осигурување. Ажурирањето на договорот за слободна трговија меѓу Туркије и Северна Македонија е исто така на дневен ред. Сметаме дека трговијата меѓу нашите земји дополнително ќе се зголеми со проширувањето на договорот на нови области.“