Украинскиот парламент усвои резолуција со која потврдува дека Владимир Зеленски ќе остане на функцијата претседател на земјата до крајот на војната.

Врховната Рада ја одобри резолуцијата со 268 гласа „за“, наведувајќи дека мандатот на Зеленски ќе продолжи до крајот на вонредната состојба. Дванаесет пратеници беа воздржани од гласање.

Во резолуцијата се наведува дека, според Уставот, Зеленски останува легитимно избран претседател на Украина и дека нови избори ќе се одржат кога ќе се воспостави мир.

Неговиот петгодишен мандат истече во мај 2024 година. Нацрт-резолуцијата не успеа при првиот обид во понеделникот, добивајќи само 218 гласа, помалку од минималните 226.

Неуспехот и се припишува на партијата Европска солидарност, предводена од поранешниот претседател Петро Порошенко. Сепак, денеска Порошенко објави дека неговата партија повеќе нема да го попречува процесот.

Претходно овој месец, американскиот претседател Доналд Трамп ја доведе во прашање легитимноста на Зеленски, тврдејќи дека е диктатор без избори.

Во понеделникот, рускиот претседател Владимир Путин рече дека Зеленски избегнува разговори со Русија бидејќи преговорите најверојатно ќе доведат до брз крај на вонредната состојба, отстранувајќи го изговорот за одложување на изборите.