Хрватскиот претседател Зоран Милановиќ изјави дека Милорад Додик е најпопуларниот политичар меѓу Србите во Босна и Херцеговина и дека процесот пред Судот на Босна и Херцеговина е обид да се отстрани од политичката сцена бидејќи не го послушал високиот претставник Кристијан Шмит.

По одбележувањето на 25-годишнината од формирањето на Хрватскиот баталјон за почесна заштита, Милановиќ на новинарско прашање ја коментираше пресудата што утре се очекува Судот на Босна и Херцеговина да ја изрече против претседателот на БиХ ентитетот Република Српска (РС) на Милорад Додик.

„Додик е најпопуларниот политичар меѓу Србите во Босна и Херцеговина. Тоа е тој европски начин што е целосно погрешен. Не е ни насилен. Тоа е некое мешање, подметнување, обид да се избрка од политичкиот живот демократски избран претставник на српскиот народ, со кој имавме многу несогласувања, бидејќи не ја послушал наредбата на колонијалниот администратор, германски политичар одамна пензиониран. Во кој век живееме? Ова ќе им се случи и на Хрватите, јас не го бранам Додик. Некој мисли дека вака ќе ги заплаши Србите, но нема. Само ќе ги натера да се побунат“ вели Милановиќ.

Милановиќ рече и дека Србите во БиХ постојано се однесуваат како да се „притиснати“, но дека Хрватите мора да се обидат да најдат заеднички јазик и договор со нив, без намера тоа да го сторат на сметка на трета страна.

„Ние само сакаме еднакви права, Хрватите сами да избираат свои претставници, ништо друго. А Србите? Нема така лесно да се отцепат од Босна и Херцеговина. Вака им се помага“, заклучи Милановиќ.

Првостепената пресуда за случајот против Милорад Додик и вршителот на должноста директор на Службен весник на РС, Милош Лукиќ, пред Судот на БиХ е закажана за среда, на 26 февруари.

Обвинителството на БиХ ги товари за сторено кривично дело „неспроведување на одлуките на високиот претставник во БиХ“.

Доколку бидат прогласени за виновни, им се заканува казна затвор до пет години и забрана за политичка активност.