Во Кан Јунис, град во јужниот дел на Газа, жителите почнаа со подготовките за светиот месец Рамазан украсувајќи ги улиците со фенери, написи и разни други украси, јавува Анадолу.

И покрај опсежното разорување што го остави зад себе израелската војна, жителите се обидуваат да ги обноват своите заедници со симболите на верата и издржливоста.

Рачно изработени декорации, блескави полумесечини и шарени светилки сега висат помеѓу зградите, внесувајќи чувство на единство и надеж.

За многумина, овие подготовки се потсетник за издржливоста и духовната сила наспроти тешкотиите.

Семејствата се посветени кон поддршка на духот на светиот месец и кон продолжувањето на обичаите за Рамазан.

Според владината канцеларија за медиуми на Газа, речиси 1,5 милиони Палестинци останале без дом или засолниште по израелската војна.

Договорот за прекин на огнот во Газа и размена на затвореници е на сила од минатиот месец, со што се запре израелската војна во која се убиени најмалку 48.350 Палестинци, главно жени и деца, и која ја остави енклавата во урнатини.

Рамазан е период за пост, богослужење и духовна обнова за муслиманите. Од зори до зајдисонце муслиманите се воздржуваат од храна, пијалоци и овосветските уживања, со цел да ја продлабочат нивната врска со Алах и да ги прочистат нивните срца.

Покрај постот, Рамазан го нагласува доброчинството, споделувањето и помагањето на оние на кои им е потребна помош. Посебните молитви за Рамазан, ифтарските оброци со семејството и дарежливоста ги зајакнуваат врските во заедницата и ја продлабочуваат духовната врска.

Оваа година Рамазан почнува во сабота на 1 март, а завршува во сабота на 29 март. Како и секогаш, светиот месец завршува со празнувањето на Рамазан Бајрам.