Српскиот претседател Александар Вучиќ објави дека американските санкции кон нафтениот сектор во земјата се одложени за 30 дена.

Вучиќ на својот профил на социјалните мрежи сподели официјален документ пратен до Србија од американското Министерство за финансии, во кој се наведува дека САД до 28 март го одложиле спроведувањето на санкциите кон Српската нафтена индустрија (НИС), со која управува руски „Газпром Нефт“.

„Имаме уште 30 дена за НИС. Ова е добра вест за народот на Србија“, наведе Вучиќ во објавата.

Во изјавата дадена од американското Министерство за финансии на 10 јануари се вели дека се преземаат сеопфатни чекори за исполнување на заложбите на Г-7 за намалување на приходите на Русија од енергетиката и дека два од главните руски производители и извозници на нафта, „Гаспром Нефт“ и „Сургутнефтегас“, како и нивните подружници, се додадени на списокот на санкционирани.

На списокот со санкционирани се најде и НИС, која е подружница на „Гаспром Нефт“.

Србија побара 90-дневно одложување од Канцеларијата за контрола на странски средства (ОФАК) на американското Министерство за финансии на почетокот на февруари, наведувајќи дека ѝ е потребно време да ги спроведе промените што САД ги побараа за НИС.