Американската технолошка компанија Епл денеска објави дека ќе отвори 20.000 нови работни места во САД и ќе инвестира 500 милијарди долари во земјата во следните четири години.

Компанијата од Купертино соопшти дека ќе започне со производство на сервери за вештачка интелигенција за својот Епл Интелиџенс систем во Хјустон, Тексас, во соработка со Фокскон.

Епл ќе го прошири и постоечкиот капацитет на центрите за податоци во Аризона, Орегон, Ајова, Невада и Северна Каролина, пишува Блумберг.

„Ќе продолжиме да работиме со луѓе и компании низ оваа земја за да помогнеме да се напише извонредно ново поглавје во историјата на американските иновации“, рече извршниот директор на Епл, Тим Кук.

Оваа објава доаѓа неколку дена по средбата на американскиот претседател Доналд Трамп и Кук во Белата куќа.

По состанокот Трамп рече дека Кук ќе инвестира стотици милијарди долари во САД и предложи со овие инвестиции Епл да избегне царини за кинески стоки.

Огромното мнозинство на Епл АјФон и другите производи се направени во Кина.

Кук успеа да го убеди американскиот претседател да не наметнува царини за АјФон телефоните за време на првиот мандат на Трамп, тврдејќи дека таквиот потег ќе ги зајакне конкурентите како што е јужнокорејската Самсунг Електроникс.

Епл тогаш најави и локални инвестиции во Соединетите Американски Држави, а се чини дека има слична стратегија и овој пат, додава њујоршката агенција.

Тим Кук се состана со Доналд Трамп во неговата резиденција Мар-а-Лаго на Флорида во ноември, а беше присутен и на претседателската инаугурација на Трамп во Вашингтон.