Rusia tha të martën vonë se çështja e ruajtjes së bazave të saj ushtarake në Siri është një temë që kërkon konsultime të mëtejshme pasi një delegacion nga Moska zhvilloi bisedime me udhëheqësin e administratës së re siriane, Ahmed al Sharaa, në kryeqytetin Damask.

“Deri më tani, asgjë nuk ka ndryshuar. Kjo çështje kërkon negociata shtesë. Ne ramë dakord t'i vazhdojmë konsultimet më të thella për secilën fushë të bashkëpunimit tonë”, u tha gazetarëve zëvendësministri i Jashtëm rus Mikhail Bogdanov.

Duke vënë në dukje se delegacioni zhvilloi bisedime "konstruktive" me administratën e re, të cilat zgjatën më shumë se tri orë, Bogdanov tha se pala ruse riafirmoi "mbështetjen e palëkundur për unitetin, integritetin territorial dhe sovranitetin e Sirisë".

Ai tha se pala ruse nënvizoi nevojën për të zgjidhur çështjet në Siri përmes një "dialogu politik gjithëpërfshirës".

Bogdanov shtoi se Rusia do të ishte e lumtur të shihte ministrin e Jashtëm sirian Asaad Al-Shaibani të vizitojë Moskën.

Më herët, mediat ruse raportuan se një delegacion rus i kryesuar nga Bogdanov dhe i dërguari i posaçëm presidencial për Sirinë Alexander Lavrentiev mbërriti në Damask, duke shënuar vizitën e parë të zyrtarëve rusë në vend që nga përmbysja e regjimit të Bashar Asadit dhjetorin e kaluar.

Vizita erdhi vetëm disa ditë pasi Bashkimi Evropian e lidhi heqjen e sanksioneve ndaj Sirisë me tërheqjen e forcave të armatosura të huaja nga territori i saj, duke u kërkuar autoriteteve siriane që t'i kërkojnë Rusisë të lirojë bazat e saj ushtarake në Khmeimim dhe Tartus.