ياۋروپا ئىتتىپاقى كومىسسىيەسى باياناتچىسى ئاننا-كايسا ئىتكونېننىڭ بىلدۈرۈشىچە، 2022-يىلى ۋېنگىرىيەگە ۋەدە قىلىنغان مەبلەغنىڭ تۇنجى بۆلۈكى 1 مىليارد 40 مىليون ياۋرو بولۇپ، بۇ مەبلەغ 2024-يىلىنىڭ ئاخىرىدا رەسمىي قىسقارتىۋېتىلگەن.

ۋېنگىرىيە بىلەن ياۋروپا ئىتتىپاقى ئارىسىدىكى بۇ تىركىشىش، باش مىنىستىر ۋىكتور ئوربان 2010-يىلى ھاكىمىيەت بېشىغا كەلگەندىن كېيىن باشلانغان. ئوربان ياۋروپا ئىتتىپاقىغا ئەزا دۆلەتلەر ئىچىدە ئەڭ ئۇزۇن مۇددەت ھۆكۈمەت باشقۇرغان رەھبەر ھېسابلىنىدۇ.

ياۋروپا ئىتتىپاقى 2018-يىلى تۈزۈمىنىڭ ۋېنگىرىيەنىڭ ياۋروپا كېڭىشىدىكى ئاۋاز بېرىش ھوقۇقىنى ئېلىپ تاشلاشقا ئېلىپ بارىدىغان «7-ماددە»سىنى يولغا قويغان بولۇپ، بۇ تۈزۈم ياۋروپا ئىتتىپاقىدا «يادرولۇق تاللاش» دەپمۇ ئاتىلىدۇ.

بۇداپېشت ھۆكۈمىتى بۇنىڭغا قارشى تۇرۇپ، ياۋروپا ئىتتىپاقىنىڭ خامچوت پىلانى ۋە كوۋىد-19 يۇقۇمى قاتارلىق قۇتقۇزۇش پىلانلىرىغا قارشى ۋېتو قىلىش ھوقۇقىنى ئىشلەتكەن. شۇنداقلا، مەتبۇئات ئەركىنلىكى، جىنسىي باراۋەرلىك ۋە پاناھلىق تىلىگۈچىلەر ھوقۇقى قاتارلىق مەسىلىلەردە ياۋروپا ئىتتىپاقى بىلەن ۋېنگىرىيە ئوتتۇرىسىدا ئىختىلاپ چىققان.

2022-يىلى ياۋروپا پارلامېنتى ۋېنگىرىيەنىڭ باشقۇرۇش شەكلىنى «سايلاملىق مۇستەبىتلىك» دەپ باھالىغان ھەمدە بۇ دۆلەتنىڭ ياۋروپا ئىتتىپاقى قىممەت قاراشلىرىغا تەھدىت پەيدا قىلغانلىقىنى ئوتتۇرىغا قويغان.

ھازىرقى تۈزۈم بويىچە، ۋېنگىرىيە 2024-يىلىنىڭ ئاخىرىغىچە سىياسىي ئىسلاھات ئېلىپ بارمىسا، ياۋروپا ئىتتىپاقىدىن ئېلىدىغان مەبلەغ تېخىمۇ قىسقارتىۋېتىلىشى مۇمكىن.

ياۋروپا ئىتتىپاقى تەرەپنىڭ بۇ قارارى ۋېنگىرىيەگە قىلىنغان ئەڭ ئېغىر جازا چارىسى بولۇپ ھېسابلىنىدۇ.